Герле сәгать, серле сәгать

Категория:

Стихи для детей на татарском языке (8+)

Дата написания:

25 декабря 1996

Заметка:

Стихотворение является частью сборника стихов для детей «Герле сәгать, серле сәгать»

Инсур Мөсәнниф
Герле сәгать, серле сәгать

Герле сәгать бар безнең,
Ялтлап тора телләре.
Гер асылган бик матур
Чылбыры да бар әле.

И кызыгам чылбырга,
Тик тияргә ярамый.
Әти бора колакны
Тотсаң аны сорамый.

Сәгать йөри "келт" тә "келт" —
Тынлап ятам йокламый.
Дәү әнием орыша:
— Йокла инде, шук малай.

Күзләреңә, әнә бит,
Гердәй йокы асылган.
Йом күзеңне, йом инде,
"Әвен базы" ачылган.

Сыйпап карыйм күзләрем —
Гере юк бит, алдалый.
Тик ни хикмәт, йомыла
Гер булмауга карамый.

— Әлли-бәлли итә бу,
Хәзер йоклап китә бу…

Дәү әнием көй көйли,
Йомылалар керфекләр…
Әй тырышам - ачылмый,
Гер асылган кебекләр.

Ахры, нәнәй алдамый,
Белми әйтмәс олылар.
Тик йокламый ник сәгать,
Аның да бит гере бар?

Ә-ә, аның бит күзе юк,
Озын теле бар болай…
Күз булмаса, йокы да
Килми микән ни, малай?

Герле сәгать түгел бу —
Серле сәгать булды бу.

Аңлый алмам, ахры, мин,
hай, бу сәгать хикмәтле!
Булам сәгать остасы —
Менә үсеп җитсәмме?!

Шул чагында белермен
Барлык-барлык серләрен.
Ачып-сүтеп карармын
Герләрен, бар җирләрен.

…Сәгать йөри "келт" тә "келт",
Күз йомыла "челт" тә "челт"…
25.12.1996.

Кайда, кайчан басылган:
1) Мөсәнниф Инсур. Герле сәгать, серле сәгать. Шигырь. "Сөю кайтавазы" китабы. Уфа, "Чурагул" нәшрияты, 2020, 135-136 бб.
2) Мөсәнниф Инсур. Герле сәгать, серле сәгать. Шигырь. "Урман ни сөйли?" китабы. Уфа, "Китап" нәшрияты, 2020, 73-75 бб.