Чәчәк белән Гөлчәчәк

Инсур Мөсәнниф
Чәчәк белән Гөлчәчәк

Җәй кояшы тәрәзәгә
Нурлары белән чиртә:
«Йоклап ятмагыз, чыгыгыз,
Түгел, – ди, – түгел иртә!»

Шулай дәшкәч Кояш апа,
Йөгереп чыкты Гөлчәчәк.
Түтәлләргә күз камаша, –
Гөл чәчәк тә, ал чәчәк!

Тик нигә моңсу гөл иле, –
Башын игән, сагышлы.
Хәлсезләнгән яфраклары
Чак-чак ала сулышны.

Гөлчәчәк тә уйга калды:
Ни булган бу гөлләргә?
Бәлагә тарыган гөлләр, –
Моны кемгә сөйләргә?

Ник сөйләргә? Ул белә лә, –
Кирәк тик су сибәргә.
Су эчерсәң, гөлләр иле
Елмаеп ук җибәрә!

Гөлчәчәккә Гөлчәчәк тә
Су сипте җырлый-җырлый.
Гөлләр елмаеп җибәрде
Озак көттереп тормый.

Талгын җилләргә кушылып,
Гөлләр ничек пышылдый:
«Рәхмәт сиңа, Гөлчәчәк, – ди, –
Син дә җырга кушыл», – ди.
1.07.2008.

Кайда, кайчан басылган:
1) Мөсәнниф Инсур. Чәчәк белән Гөлчәчәк. Шигырь. "Сөю кайтавазы" китабы. Уфа, "Чурагул" нәшрияты, 2020, 151-152 бб.
2) Мөсәнниф Инсур. Чәчәк белән Гөлчәчәк Шигырь. "Урман ни сөйли?" китабы. Уфа, "Китап" нәшрияты, 2020, 67 б.