Юлларның бар төрлесе...

Инсур Мөсәнниф
Юлларның бар төрлесе...

Юлларның бар төрлеләре...
Авыры бар, җиңеле...
Хәерлесе, уңышсызы...
Тигезе һәм түгеле...

Юлларның бар төрлеләре...
Ялгыз гына үткәне...
Я юлдашлар очраганы –
Азга яки күпкәме...

Басу юлы, олы юллар,
Кадаклысы, чөйлесе...
Юл өзеклек чорлары да...
Әйе, була төрлесе –

Ерагы һәм бик озыны!
Узганнары бер көйгә...
Нинди генә булса да ул –
Алып кайтсын тик өйгә!..
21.02.2018.

Кайда, кайчан басылган:
1) Мөсәнниф Инсур. Юлларның бар төрлесе. Шигырь. "Сөю кайтавазы" китабы. Уфа, "Чурагул" нәшрияты, 2020, 211 б.