Инсур Мусанниф

Инсур МӨСӘННИФ
КАЗЛАР САКЛЫЙ БАБАЙ

Олы урам чатлыгында
Бер бабай казлар саклый –
Тыз-быз узган машиналар
Күрмәсен берүк таптый...

Ахры, бары тәү карашка,
Күрәсең, ул – карт, бабай:
Уе белән балачакта,
Күңеле – һаман малай.

Үткән-сүткән ханымнарга
Каладыр шук күз атып.
Холкына карап, аларның
Кайберсенә сүз катып.

“Үпкән, кочкан – җилгә очкан”, –
Кеше нәрсә димәсен,
Бәлки, берсе яшьлегендә
(Кеше күң(е)лен кем белсен...)
Яндыргандыр йөрәген...

...Урам. Чирәм. Казлар. Бабай.
Бабай ниләр уйлыйдыр...
Каз гомере – бигрәк кыска...
Безнеке дә шулайдыр...

Казлар атлый салмак кына,
Алар әле кадерле...
Тик көз генә җитсен әле...
...Каз адымы, сәгать сыман,
Саный безнең гомерне...
6-7.07.2026