Инсур Мусанниф

Инсур МӨСӘННИФ
ХЫЯЛЫЙ ШАГЫЙРЬ

Кышын шигырь язмадым мин –
Каләмдә туңды кара.
Чөнки туңды күңелем дә –
Бу дөнья кая бара?!

Инде яз да ишек какты...
Күгәрчен гөрләп йөри...
Тик шунысы – күңелдәге
Карны кем килеп көри?

Күгәрченгә ике дөнья –
Бер морҗа, тамагы тук.
Әллә шулай тоеламы?..
Кош телен аңлаучы юк...

Кош та белми минем хәлне:
“Көр, гөр” – дип, ары очты...
Тик калдырды каурый каләм...
Хәзер мин шуны очлыйм:

Күңелдәге, дөньядагы
Туң карларны һәм бозларны
Эретер һәм агызыр
Көчкә ия (бу – хыялдыр?)
Булмасмы язып бер җыр?!
6.03.2024.