Гафу сорыйм

Инсур Мөсәнниф
Гафу сорыйм

Кемдер китә җирдән бик вакытсыз.
Сорау туа, бәлки, бик урынсыз:
Бик вакытсыз, бик тә... Ни сәбәпле?
Тәкъдирме бу? Яки кем гаепле?

Син вакытсыз киттең... Мин гаепле...
Сорыйм синнән бары гафу, гафу...
Әмма.... тагын әллә кемнәргәдер
Саклыйм бары ачу, ачу, ачу...

Миндәме ул? Башкадамы? Белмим...
Белмәгәнгә барысына саклыйм ачу.
...Барысына ачу саклаганга
Аллаһыдан сорыйм гафу, гафу...
31.08.-7.09.2020

Кайда, кайчан басылган:
1) Мөсәнниф Инсур. Гафу сорыйм. Шигырь. «Салават күпере артыннан» китабы. Уфа, "Книга-принт" нәшрияты, 2025, 30 б.