БЕЗ НИГӘ ЮЛӘР ТҮГЕЛ?

Категория:

Стихи на татарском языке (16+)

Дата написания:

26 октября 2022

Инсур МӨСӘННИФ
БЕЗ НИГӘ ЮЛӘР ТҮГЕЛ?

Нинди кайгы кичермәгән
Бу Җирдә кемнәр генә.
Бер хәсрәтсез яшидер ул
Бары тик юләр генә.

Бер уйласаң, менә алар
Җирдә бит иң бәхетле.
Кайгырмыйлар – чөнки алар
Бу дөньяны аңламыйлар,
Көлсәләр дә нихәтле...

Алар өчен барсы әзер –
Төнгә түшәк һәм калҗа:
Алар өчен барысы да
Ике дөнҗа* – бер морҗа...

Юләрләр бит – иң бәхетле,
Белми солых*, сугышны...
Тик без никтер теләмибез
Мондый татлы язмышны.

Юләр булсак, белмәс идек,
Бу дөньяның михнәтен.
Һәм, билгеле, яшәү дигән
Михнәтнең... бар рәхәтен.

* Дөнҗа (диалект) – дөнья.
* Солых (борынгы) – тынычлык турында, яки үзара сугышны туктату хакында төзелгән килешү (бу сүзнең куланылышы, мисалга, Л.Толстой, “Сугыш һәм солых” роман-эпопеясы).
23-26.10.2022