Инсур Мусанниф

Инсур МӨСӘННИФ
АТАЙСАЛЫМ

Атайсалым – Башҡортостан,
Атайсал – тыуған яғым,
Бер(е)һе булһа, оло Ватан,
Кесеһе – ҡала, ауыл!

Атайсалдың гүҙәллеге
Һоҡланғыс көн-төнөн дә:
Күлдәрендә аҡҡош йөҙә,
Бөркөт оса күгендә;

Киң ҡырҙарҙа иген шаулай –
Төп байлығы илемдең.
Кемде генә һоҡландырмай
Күркәмлеге еремдең!

Һабантуйҙа ат сабышы –
Алдан килә бер толпар.
Әйтерһең дә, ҡартатайым
Эйәрләгән сал саптар.

Киң ҡырҙарҙа һаҡланалыр
Олатайым эҙҙәре,
Болондарҙа зәңгәр сәскә –
Өләсәйем күҙҙәре...

Тауҙар, күлдәр, киң болондар –
Ата-бабам төйәге.
Йөрәгемдең иң түрендә –
Һине мәңге һөйәрмен!

Ил-мирасты һаҡлап калыу –
Был беҙҙең төп бурыстыр.
Атайсалда йәшәүебеҙ
Үҙе оло ырыстыр!

Йәшәек беҙ, йәшнәек беҙ
Кесе тыуған илдәрҙә –
Атайсалдың бар яҙмышы
Инде беҙҙең иңдәрҙә!
10-11.01.2023