Инсур Мусанниф

Инсур МӨСӘННИФ
АШЫКМАГЫЗ

Ашыктырса да бу фани дөнья,
Кабаланмаң! Ашыкмагыз!..
Зур юлларда күпме җан өзелгән...
Сабак алып, ашкынмагыз.

Ашыкканнар, әнә, ашка пешкән,
Туймагандыр тамагы да...
Торып калган җирдә, убырларча,
Гомер җыйган бар малы да.

“Акрын ашыгыгыз!” – дигән берәү...
Яки “уйлап ашыгыгыз!”...
Сезгә дигән дөнья малы бетмәс,
Сынмас муен... кашыгыгыз...

...Акыл өйрәтүе, ай-һай, җиңел...
Хәбәр килде (көтми идем):
“Бик ашыгыч, абый, тиз килеп җит!”
...Кабаланып, чыгып киттем...
27.03.2025