ЯЗ КИЛДЕ... “ЯЗ!”, – ДИДЕ...

Инсур Мөсәнниф
ЯЗ КИЛДЕ...
“ЯЗ!”, – ДИДЕ...
Уен катыш

Ниһаять! Яз! Яз! Тәүге көн
Тамчы тама түбәдән!
Шатлыкларга шатлык өстәп,
Тамчы тама... түшәмнән!

(Тәүге шатлыгы шул инде –
Бүген Ирләр бәйрәме.
Түбәдә котлау билгесе –
Боз сөңгеләр бәйләме).

Һич кайгырмыйм.
“Яз килде!” – дип,
Дәртләндерәм үземне.
Тамчыга карап, дан җырлыйм,
Җәлләмичә сүземне!

Тамчыкаем, там, әйдә, там,
Тавышыңны яратам.
Кәстрүлдәге “чың-чың”ынны
Ишетим, дип, җан атам.

Шылтыраттым... Килмәделәр,
Аларның үз шартыдыр:
Июньнәргә карлар эреп
Бетәр, диеп ятадыр.

Тыңлап ятам исем китеп,
Көндезен дә, төнлә дә.
Ниһаять, җанда, күңелдә...
Тышта да яз, өйдә дә!
23.02.2022

Кайда, кайчан басылган:
1) Мөсәнниф Инсур. Яз килде... «Яз!», – диде... Шигырь. «Салават күпере артыннан» китабы. Уфа, "Книга-принт" нәшрияты, 2025, 138 б.