Сайт писателя-сатирика Инсура Мусанифа

Инсур Мусанниф

Официальный сайт писателя-сатирика

Сер ачкычы

Дата написания: 
23 апреля 2018

Инсур Мөсәнниф
Сер ачкычы

Шигырь язган чакларым бар...
Шагыйрь, диләр, хәтта зурлап...
(Күндәммен шул, карышкан юк,
Әйтмәсеннәр бары хурлап...).

Шуңа, ахры, кемнәргәдер,
Тормыш юлым кызыклыдыр,
Кемгә нәрсә: миңа кызык
Кеше булса кызыксыныр...

Бәлки чынлап кызыклыдыр,
Яки бары очраклыдыр...
Яки эзләп маташудыр
Тырнак астан пычраклыкны...

...“Мәхәббәттән тора тормыш,
Шул хакта да язасызмы?” –
Диеп сорый бер яшь егет,
Ихластанмы, чарасызмы...

Мәхәббәттән тилерепләр
Яшьрәк чакта йөрисең ул...
Урынлымы, урынсызмы,
Шушы хакта сөйлисең ул;

Көн-таң атса, сөйгәнеңне
Уйлыйсың ул өзми-куймый...
...Гаебе юк мондый хәлнең –
Гормоннар бит... “гармун уйный”.

Тик гармуннар бер тына шул –
Хисләр дә бер басыладыр.
Әмма тормыш гүзәллеге
Башка яклап ачыладыр.

Нинди яклап – менә мон(ы)сын
Әйтми торам, серем булсын!
Сер ачкычы – тик үзеңдә...
Менә сиңа илле тулсын...
Менә сиңа алтмыш тулсын...
Менә сиңа җитмеш тулсын...
Менә сиңа сиксән тулсын...
Менә сиңа туксан тулсын...
Насыйп булса, йөзең тулсын...
22-23.04.2018.

Добавить комментарий