Сайт писателя-сатирика Инсура Мусанифа

Инсур Мусанниф

Официальный сайт писателя-сатирика

Кайсы сурәт матуррак?

Дата написания: 
16 мая 2018

Инсур Мөсәнниф
Кайсы сурәт матуррак?

Бүләк итте әни миңа
Төрле төсле каләмнәр.
Сурәтләрем матур чыга –
Көнләшерлек рәссамнәр.

Әниемне дә төшерәм,
Төшерәм кояш-айны,
Йорт хайваннарын барын да,
Онытмыйм маэмайны.

Бу сурәттә – безнең урам:
Әнә, бара машина...
Чирәмдә бәбкәләр йөри,
Песи – агач башында.

Матур-матур сурәт белән
Кәгазь битен тутырам,
Барысы да килеп чыга,
Шуннан сокланып торам.

Тик кайсысы матуррак –
Кирәк берсен сайларга...
Үзем генә әйтә алмыйм,
Инде кемнән сорарга?

Карадым да... Ник сорарга,
Әйтте күптән әтием:
Юк торасы икеләнеп,
Иң матуры – әнием!
16.05.2018.

Кайда, кайчан басылган:
1) Мөсәнниф Инсур. Кайсы сурәт матуррак? Шигырь. "Урман ни сөйли?" китабы. Уфа, "Китап" нәшрияты, 2020, 81 б.

Тәүге варианты
Инсур Мөсәнниф
Кайсы сурәт матуррак?

Бүләк итте әни миңа
Төрле төсле каләмнәр.
Сурәтләрем матур чыга –
Көнләшерлек рәссамнәр.

Маэмайны төшерәм,
Кояш, айны төшерәм,
Бәтине дә төшерәм,
Әтине дә төшерәм,
Әнине дә төшерәм,
Бәбине дә төшерәм...

Менә бара машина...
Песи – агач башында.
Ә бәбкәләр – чирәмдә,
Йөгерешә тирәмдә...

Кәгазь битен тутырам,
Аннан карап утырам.
Матур-матур сурәтләр
Барысы да бер рәттә –

Тик кайсысы матуррак –
Кирәк берсен сайларга...
Үзем генә әйтә алмыйм,
Инде кемнән сорарга?

Карадым да... Ник сорарга,
Әйтте күптән әтием:
Юк торасы икеләнеп,
Иң матуры – әнием!
16.05.2018.