Сайт писателя-сатирика Инсура Мусанифа

Инсур Мусанниф

Официальный сайт писателя-сатирика

Бирегезче миңа...

Дата написания: 
19 октября 2019

Инсур Мөсәнниф
Бирегезче миңа...

Сорыйм әле сездән, әй, кешеләр
(Кемдер үтәр бәлки гозерне):
Бирегезче миңа яңа дәфтәр,
Чиста биттән башлыйм гомерне.

Дөрес, читкә куймыйм искесен дә –
Тиеш ул да ярдәм итәргә:
Максатларга тизрәк җитү өчен
Хаталарны читләп үтәргә.

Калдырам тик яхшы гамәлләрне,
Дөрес ясыйм һәрбер адымны...
Карап йөрим һәрчак тирә-ягым,
Кем әйтмешли, “артым-алдым”ны...

Элек, күзне йомып, урап узган
Алтын-көмеш тавын актарам...
Ә эшнеме... эшне, ялкауланмый,
Ун тапкырга күбрәк башкарам...

Чәчәк түтәлләре ясар өчен
Җиргә күмәм көл һәм күмерне...

Бирче миңа, Аллаһ, яңа дәфтәр,
Чиста биттән башлыйм гомерне...
17-19.10.2019.

Добавить комментарий